دور المهندس الكيميائى 2

اتكلمنا عن عملية التصميم Plant Design و احب اضيف ليها برضو عمليات التوسعة Expansion .. لما الهدف هنا مبيكونش تصميم مصنع من الصفر .. بيكون ببساطة اضافة وحدة Unit او مجموعة وحدات للمصنع للاستفادة من النواتج الجانبيةSide Products .. او الطاقة الزايدة عن الاحتياج
برضو المهندس الكيميائي هو المسؤول عن تصميمها و تشغيلها بالشكل اللي يخليها متتعارضش مع عمل المصنع ..

في مناصب كتير في المصنع برضو بيشغلها المهندس الكيميائي بتشارك نوعا ما في عملية التشغيل و التحكم Operation and Control

- مهندس السلامة Safety Engineer : دوره هو التأكد من أنظمة السلامة في المصنع و وضع سيناريوهات الاغلاق الطارئ Emergency Shutdown اللي اتخاذها بيكلف ملايين .. لكن لابد منها عشان الحفاظ على سلامة الاشخاص و المعدات و المنشآت
- Environmental Engineer دوره هو التأكد من مطابقة مخرجات المصنع للقوانين و الشروط البيئية الموضوعة من قبل المنظمات الدولية البيئية ..
- مهندس خدمات الدعم التقني Technical Service Engineer و ده دوره انه يقدم الخدمات الفنية لقسم التشغيل و التحكم .. زي التخطيط و الحسابات و الاشراف على صيانة المعدات و صيانة المصنع اللي بتوقف الانتاج فترة معينة من السنة عشان التأكد من كل حاجة

المهندس الكيميائي ليه أدوار بره المصنع .. في الشركات اللي بتصمم أنظمة التحكم و أدوات القياس .. و في شركات البرمجيات الهندسية اللي بتصمم أنظمة المحاكاة Simulation Software
في بعض البنوك المهندس الكيميائي بيشتغل مستشار هندسي عشان يدرس ربحية المشاريع الصناعية اللي بتتعرض عالبنك للمشاركة فيها أو تقديم القروض ليها .. و نفس المنصب ده موجود في بعض شركات التأمين ..
المهندس الكيميائي بيشتغل في مجال تحليل البيانات Data Analytics و اللي بتهدف لفهم طبيعة الصناعة و ازاي ممكن نطورها و نحقق الانتاج الامثل بطرق مبتكرة و مبدعة
و ممكن يشتغل في حاجات كتير خارج نطاق تخصصه .. باعتبار انه شخص غالبا لغته قوية و قاعدته العلمية و الرياضية قوية و سهل جدا يفهم في أي موضوع ممكن يقرا فيه ..

و ده الموضوع الاول عن دور المهندس الكيميائى