اول يوم فى كلية هندسة

اول يوم فى كلية الهندسة بيبقى بالنسبالك يوم لطيف مليان تفاؤل وفرح وسعادة انك دخلت الكلية اللى نفسك فيها وحاببها وبالذات لو دخلت هندسة طبعا احدى كليات القمة يعم هيص مين قدك

مبدأيا كده خد شوية نصايح ليك عشان متقعدش الخمس سنين يتحفل عليك فى الكلية

1- التحذير التقليدى انك متروحش ببدلة اول يوم طبعا عشان هيتحفل عليك لمدة خمس سنين تانى لو عملت كده

2- متاخدش المسطره معاااااك اول يوم

3- متاخدش المسطره معااااك اول يوم برضو

4- حاول متستظرفش كتير اول يوم عشان ف حاجه اسمها الانطباع الاول بيدوم فليه تخلى الناس تاخد عنك فكرة وحشة

5- اول يوم ف اغلب الكليات بتاعة هندسة اوعى تستنى welcome party او حفله استقبال احنا مش بتوع الكلام ده احنا متاخرين ف المنهج من اول يوم اصلا

6- متستعجلش من اول يوم وتروح تبص ع بنات صيدله لان صيدلة هيجيلها وقتها متخافش

7- انت اول يوم تروح باشا او برنس كده ف نفسك معاك قلم وكشكول تكتب الادوات المطلوبه وبس لا تاخد معاك T ولا ارسطو ولا مثلثين 45 و 60 ولا اى حاجه

8- الجامعات بتمشى بنظام المحاضرات والمحاضرة بتكون مدتها من 2-4 ساعات هتحس انك مليت ف الاول لانك مش متعود ع النظام ده لكن هتتعود متقلقش

9- متكتبش eng ع الفيس ده لمصلحتك انت والله

10- هتلاقى كائنات تحسها اكبر منك ممكن تصادف و تقعد جنبها فى المحاضرة و هيفضلوا يرغوا معاك و يحبطوك و يقولك الدكتور ده هتشيل معاه ونت متعرفش يعنى ايه تشيل اصلا .. دول اخواتك المدبلرين سيبك منهم

11- بلاش تروح لابس نضارة شمس و تدخلنا بيها المدرج وحياة امك يا شيخ بلاش

12- بنات هندسة مش للاستظراف معاهم ده لمصلحتك انت والله

قولولنا فى الكومنتات ايه تانى مينفعش يتعمل اول يوم و هناخد سكرينات و تنزل على الصفحة بالليل