تعريف بقسم الهندسة الكيميائية
هبدأ بتعريف مختصر عن الهندسة الكيميائية .. خصوصا ان في لبس كبير لاحظته عند ناس كتير بتخلط بينها و بين اللي بيدرسه ولاد عمنا في كلية علوم قسم كيمياء
.
مبدئيا كده واحد من التعريفات اللي انا بحبها لكلمة هندسة هي Optimization of Resources .. يعني الاستخدام الامثل للمصادر .. فلما تيجي كلمة كيميائية بعد كلمة هندسة يعني احنا دورنا نستخدم العلوم الكيميائية بشكل أمثل لتصميم و متابعة و التحكم في العمليات الصناعية ..
طيب .. هل احنا دورنا بس نستخدم العلوم الكيميائية ؟
عن خبرة قصيرة .. احنا بنستخدم العلوم الفيزيائية و الرياضيات أكتر من العلوم الكيميائية .. عشان كده في بعض الدول بدأوا يستخدموا اسم هندسة العمليات Process Engineering على الهندسة الكيميائية و ده اسم أقرب كتير لطبيعة التخصص .. يمكن لسه بيستخدموا اسم الهندسة الكيميائية لأننا الوحيدين اللي بنعرف نستخدم العلوم الكيميائية في الصناعة مما يميزنا عن هندسة ميكانيكا و هندسة الانتاج ..
و عشان ندي نظرة اوسع عن الفرق بين الهندسة الكيميائية و باقي التخصصات .. يبقى ادوني فرصة اشرحلكم احنا بندرس ايه بالظبط في هندسة كيميائية ..
اول حاجة .. احنا بندرس رياضيات .. رياضيات كتير .. خصوصا علوم التفاضل و التكامل Calculus و المعادلات التفاضلية Differential Equations و شوية احتمال و احصاء Probability and Statistics
بندرس علوم فيزيائية مهمة زي الديناميكا الحرارية Thermodynamics و ظاهرة النقل Transport Phenomena اللي بندرج تحتها ميكانيكا الموائع Fluid Mechanics و انتقال المواد Mass Transfer خاصة عمليات فصل المواد Separation Processes و انتقال الحرارة Heat Transfer
ظاهرة النقل دي هي اللي بتساعدنا على فهم انتقال المادة و الشغل و الحرارة من أي نظام للي حواليه لأننا من الاخر هنطوع الحاجات دي في الوصول لهدفنا و هو انتاج عملية صناعية ..
هندسة ميكانيكا لازم يدرسوا الFluid Mechanics و الHeat Transfer لأنهم بيستخدموا نفس الأدوات دي لكن احنا مميزين بدراستنا للMass Transfer و اللي هي اغلبها عمليات فيزيائية ..
في الكيميا بقى بندرس شوية اساسيات برضو من الكيمياء العضوية Organic Chemistry و التحليلية Analytical Chemistry و ساعات الحيوية Biological Chemistry
و لكن بيميزنا دراسة هندسة التفاعلات Reaction Engineering و ده اللي بيساعدنا نصمم مفاعل كيميائي ديناميكي من الصفر لانتاج اي مركب كيميائي ..
و بكده ننتقل لمرحلة التصميم .. بندرس تصميم الاجهزة الصناعية من الجانب الكيميائي .. و بيكملنا فيه اخواتنا في ميكانيكا من الجانب الميكانيكي Equipment Design و بعد كده بننتقل لتصميم المصنع ككل Plant Design
بكده لما انت تيجي تقولي انتجلك ميثانول .. أو نفثا .. أو بلاستيك .. أو أكررلك بترول خام أنا أقدر استخدم العلوم الطبيعية دي في اني اصمملك عملية صناعية من الصفر
طيب هنسيب العملية دي ماشية على حل شعرها كده ؟ مش لازم نتحكم فيها ؟ عشان كده بندرس مبادئ تحكم العمليات و الادوات الدقيقة Instrumentation and Process Control
و ده بيساعدنا نتحكم و نتأكد من جودة المنتج و جودة العمليات نفسها Quality Assurance and Control .. خلال التصميم ده بنتعرض لمشاكل كهربائية عشان كده بندرس دواير كهربية و مبادئ الالكترونيات Circuit Theory and Electronics
طيب .. هل احنا دورنا نصمملك العملية حتى لو كانت مكلفة بمبدأ اطبخي يا جارية .. كلف يا سيدي ؟
لأ طبعا .. عشان كده بناخد جولة في مبادئ الاقتصاد و ادارة الاعمال Engineering Economy and Operations Management
طيب يعني انا عملتلك العملية الصناعية و اتحكمتلك فيها و كسبتك فلوس .. تولع البيئة بقى على سلامة الناس و المنشآت ؟
أكيد لأ برضو .. عشان كده بندرس أساسيات الEnvironmental Management Systems و السلامة الصناعية Industrial Safety أو Process Safety
خلال دراستنا للمواد دي مش دايما بنستخدم الحسابات اليدوية لأنها في بعض الاحيان بتكون معقدة جدا و عشان كده بنستخدم برامج الكمبيوتر كتير جدا في الحسابات .. فغالبا في سنة تانية او تالتة بندرس الComputer Applications اللي بنتعلم فيها بعض اساسيات البرمجة ..
و الطرق الرقمية اللي بنختصر بيها حسابات كتير Numerical Analysis
يعني احنا من الاخر اللي بنبص عالعمليات الصناعية من فوق و بنضمن استمراريتها و ربحيتها و حفاظها عالصحة و السلامة و البيئة ..
عشان كده بنشتغل في مصانع تكرير البترول .. مصانع الأدوية .. مصانع المعادن زي الحديد و الألومنيوم .. مصانع البتروكيماويات .. شركات البرمجة الهندسية .. حتى في مجال البنوك و التأمين لازم يكون في مستشارين هندسيين عندهم خلفية من هندسة كيميائية ..
ده غير ان خلفيتنا الرياضية بتأهلنا نشتغل في أي مجال تاني .. و نقدر نكلم أي مهندس بلغته .. أي نعم مبندرسش التفاصيل .. بس مش هنتوه لما مهندس كهرباء يتكلم قدامنا عن الopen circuit و الshort circuit أو الOp-Amps و الTransformers و لما مهندس الكترونيات يكلمنا عن الDiodes و بتاع اقتصاد لما يكلمنا عن الInternal Rate of Return و الBreakeven و الPayback Period
ارجو ان يكون شرحي واضح بالنسبالكم .. و يسعدني الاجابة عن اي استفسار أو تساؤل ..
ليست هناك تعليقات