ادوات الرسم الهندسى فى اعدادى هندسة
بصوا بقى الدفعة الجديدة تصحصح و تركز معايا كدة علشان ميتضحكش عليكم و تدفعوا فلوس عالفاضى فى ادوات ممكن متسخدموهاش طول فترة وجودكم فى هندسة !
طبعا بتاع المكتبة شايفك واد او بنت جايين جداد متعرفوش حاجة يديك طقم براجل ب 90 جنيه قال هو ده اللى هيحسسك انك مهندس مع انك هتكتشف ان باقى السنة هو برجل واحد بتستخدمه الدفعة كلها و بيجاب ب 6 جنيه ولا حاجة
علشان كدة صحصحوا كدة معايا فى الادوات اللى هتحتاجوها و وصلوا الموضوع ده لكل صحابكم
بص يا سيدى
1- المسطرة و دى هتجيبها 80 CM و هيبقى ادامك اما روترنج او سمير و على .. مبدئيا هات البلاستيك متجيبش الخشب لان البلاستيك اسهل فى التعامل معاها علشان نضافة اللوحة و الكلام ده. سواء سمير و على او روترنج كله هيأدى معاك الغرض فلو معاك فلوس اوك روترنج افضل لو مش معاك سمير و على كويسة جدا و مش هتفرق كتير فالاخر. ملحوظة بسيطة بس لو ناوى تدخل عمارة يبقى اشترى المسطرة 120 CM بالمرة علشان تشتغل معاك ادام ان شاء الله فى عمارة.
2- طقم مثلثات هو مثلث 30 60 اسمه كدة علشان هتلاقى فيه زاوية قايمة و زاويتين واحدة 30 و التانية 60 ... المثلث التانى بقى 45 ده فيه زاوية 90 و الاتنين التانيين 45
3- فى مثلث اسمه ارسطو اشتريه و اتعود عليه من دلوقتى هو مفيد جدا ليك و مفيد فى حاجة مهمة بس مش عايز افتح عنيكم عليها من دلوقتى (الى يعرفها منكم يقول فى الكومنتات تحت) المهم نكمل ارسطو ده لوحده متعة كدة و بيسهل و يختصر وقت كتير فى الرسم
4- استيكة نضيفة كدة بنت ناس هات استيكة قلم و استيكى عادية ... و الفوطة اللى بتنضف بيها اللوحة هتلاقيها برتقانى كدة زى اللى بتشوفها عن الميكانيكى بتاع العربيات
5- البوردة اللى هترسم عليها اكيد و خلى بالك ان فى كليات بتسلمك بوردة مجانى فى اول السنة و تستلمها منك اخر السنة ف اسال بردو فى الكلية عندك الاول و لو حابب يبقى معاك بوردة ليك يبقى توكل على الله و اشتريها
6- قلم سنون و ده هاته روترنج علشان ده الحاجة الوحيدة اللى بحس روترنج متفوقة فيها عن اى شركة تانية هات قلم .5 mm و .3 mm متجيبش غير الاتنين دول
7- علبتين سنون للقلمين دول اكيد
8- لزق (سلوتب) لتثبيت اللوحة فى البوردة زى ما هتتعلم فى السكشن ان شاء الله
9- فى جراب و رولة دول كماليات بس هتحسهم بيلمولك الدنيا الرولة دى بتشيل فيها اكتر من لوحة و تقدر بعد كدة تحطها فى الجراب هى و المسطرة
كدة الادوات خلصت بس فى نصيحة صغيرة ليك ( اوعى ... اوعى تانى تفكر تتصور ونت ماسك المسطرة ال T )
اللهم بلغت اللهم فاشهد
يا رب الموضوع يكون مفيد ليكم و اى استفسارات احنا تحت امركم
ليست هناك تعليقات