رجل اعمال - ولا موظف عادى ؟؟ تفرق كتير
الحياة العمليه مش سهله وبسيطه ولا لونها بمبى زى ما سعاد حسنى قالت خالص
.
زى ما معظم الناس فاكره انه هيتخرج هيلاقى مليون شركه او مصنع مستنياه عشان تاخده بالحضن وتقوله انت فين من زمان ياراجل ... فى بدايه الحياه العمليه دى بتلاقى ضغوط كتير واحيانا عدم تكيف دا غير الجانب المادى الى هيحدد شكل حياتك ماشى ازاى .
.
فالاول بتبدأ كموظف عادى جدا سواء كنت فى قطاع عام او خاص او استثمارى وكل وظيفه ليها مرتب مختلف ممكن يكون كبير او صغير بتيجى عليك لحظه التكيف انك خلاص بدات تتعود على النمط دا لكن هيجى عليك وقت تقول فيه لنفسك انا يوم ما بحوش الف جنيه بقول يا سلام وبعمل عليهم فرح وانه مبلغ كبير من بره مع انك لو جيت تبص عليه هتلاقيه مش فلوس اليومين دول
.
فتبتدى تفكر وتكتشف ان سواء ال 8 او 12 او 16 ساعه اللى بتقضيهم شغل كل يووم بيعملوا فى حدود 12 الف جنيه فى السنه .. ودا طبعا مع شويه تقشف على حبه بخل على النفس وحبه اقتصاد وتوفير .. ويجى هنا السؤال هو العمر فيييه كام سنه اصلا !!! عشان يضيع منه كل دا على 12 الف جنيه.
.
وهنا تبدأ مرحله الحقد الطبقى فتبدأ تبص على جارك اللى اختار الطريق السهل والتجار اللى يا عالم ماشين بالحلال ولا بغيره وان اللى انت بتتعب فيه عشان تحوشه فى سنه هما بيعملوه فى اقل من شهر
.
ويفضل يتطور الحقد دا جواك لحد ما يوصل للحسد المكتوم مع شويه شماته بيظهروا لما نعرف انه طلع نصاب او يقع فى شغله وهكذا
.
دوستويفسكى مرة فى نوفيلا "المقامر" الرائعة قال ان النوع الاول ده زى المواطن الالمانى اللى طول عمره بيشتغل و طلعان عينه و بيحوش القرش على القرش و فى الاخر بيموت محترم و فقير و يورث الفقر و الانضباط للجيل اللى بعده , و قال ان النوع التانى زى الروسي اللى بيكسب الالاف من الفلوس فى القمار و يموت مفلس بس سعيد
.
و عموما و بشكل عام عمو شكسبير قال مره "الحياة مملة مثل حكاية تروى مرتين فترهق الأذن الثقيلة لرجل نعسان" ... و ابن الهرمه كان عنده حق
ليست هناك تعليقات